عشان حبك يكبر

عشان حبك يكبر.. التزم بالجدول


في الرسايل السابقة كنا بنتكلم عن الطرق والوسائل اللي تخلي علاقة الحب أكثر قوة والأطراف أكثر قربا -والأهم- تفاهما.. بعد الجواز، أو حتى بعد الخطوبة، وانتهاء مرحلة الرومانسية الفظيعة المدمرة القوية، الطرفين ممكن بيقعوا في مشكلة لما بيتنقلوا من العالم السحري الخيالي اللي كانوا عايشين فيه للواقع.. يعني أول لما يلاقوا إن فيه قدامهم التزامات وتحديات سواء كانت على المستوى المادي أو الاجتماعي.. طريقة الحوار اللي بينهم بتتغير.. مفرداتهم بتتغير.. بيتكلموا عن التقسيط والفواتير والزيارات العائلية والمجاملات وخلافه
وزي ما المثل بيقول على قد العشم، على قد الزعل.. أي خناقة أو عدم تفاهم بين الطرفين بيكون له تأثير كبير، وبيتبني عليه آراء وتحليلات نقدر نقول إن فيها شيء من المبالغة.. وخلونا نشوف الحوار اللي دار بين ريم وصاحبتها عشان ناخد فكرة أوضح
*******


ريم: أنا مخنوقة قوي.. بقالي كام يوم مش عارفة مالي
صاحبة ريم: وليد مزعلك ولا إيه؟
ريم: عارفة مشكلة وليد إيه؟ إن ذاكرته ضعيفة جدا.. عمري ما باقول له على حاجة ويفتكرها.. بينسى الطلبات اللي باطلبها منه، بالرغم من إني بافكّره كتير
صاحبة ريم: دي أكيد حاجة مزعجة جدا.. ويا ترى إنتِ واجهتيه بده؟
ريم: أيوه طبعا ومافيش فايدة أبدا.. مافيش حاجة بتتغير.. ده أنا حتى قلت له نفس الكلام
*******
إيه المشكلة هنا؟
المشكلة هي في إن ريم عممت، ماذكرتش مواقف معينة أو قالت مثال على طبيعة الأفعال أو التصرفات اللي بتؤدي إلى شعورها بالإحباط أو اللي موصلة ليها إحساس إن جوزها فعلا ذاكرته ضعيفة
*******
المفروض الحوار ده كان يحصل
ريم: وليد ذاكرته ضعيفة.. عمره ما بيفتكر أي حاجة تخصني.. طلبات البيت نسي يشتريها امبارح.. والأسبوع اللي فات مثلا كنت طالبة منه إننا نخرج، لقيته اتأخر عليّ وأنا كنت لابسة ومستنياه.. اتصلت بيه، لقيته ناسي خالص! ده حتى نسي يشتري لي حاجة في عيد ميلادي
*******
وعشان نفهم الموضوع أكتر خلينا نقارن بين أنواع الشخصيات التلاتة اللي جايين دول لما بيتعرضوا لمشكلة ما
فيه شخص وهو في عز المشكلة مش بيحس إن عنده مشكلة.. وده مالناش دعوة بيه خالص دلوقتي


فيه شخص لما بيكون فيه مشكلة بيدركها بس بيتوقف عندها من غير ما يحاول يوصل لحل


فيه شخص لما بيكون في مشكلة بيدركها، ويحاول يوصل لحل، وفعلا بيقدر.. وده اللي احنا عاوزين نوصل له


وعشان ريم تتحول وتكون إيجابية زي الشخص الثالث لازم تفكر بالطريقة دي
لازم ريم تغير من نبرة الاتهام، والنقد دي إلى رغبة أو إلى اقتراح لحاجة أكثر إيجابية. يعني مثلا بدل ما تقول لجوزها إنه بينساها وبيهملها، تقول له إنها محتاجة اهتمام أكتر منه. بعد كده تشرح له الأذى النفسي اللي بيحصل لها لما هو بينسى زي مثلا: لما بتنسى، باحس إننا مش مرتبطين ببعض زي زمان. بعد كده تقول له على حاجات محددة تحل الموضوع ده زي مثلا إنها تحدد جدول يخرجوا فيه مع بعض أو يتسوقوا سوا أو بإنه يساعدها في شغل البيت مثلا
*******
يعني الحل باختصار في النقط دي
واحد: معرفة المشكلة
اتنين: تغيير نبرة للاتهام إلى تعبير عن رغبة في التغيير
تلاتة: تحديد حلول عملية يلتزم بيها الطرف التاني
فيه نقطة مهمة، لازم الناس تتوقع إن هيكون في مقاومة من الطرف اللي هيكون مطلوب منه تنفيذ الحلول المقترحة، ودي حلها هنقوله بعدين.. خلونا دلوقتي نتخيل قائمة أو جدول بالحاجات اللي ممكن تحسن علاقة ريم بجوزها.. ريم ممكن تطلب من جوزها
تخصيص جزء من وقته كل أسبوع عشان يخرج معاها بعيدا عن أي أجواء عائلية أخرى
إنه يشتري لها هدية رقيقة في عيد ميلادها بنفسه ويغلفها بمعرفته كمان
إنه يتصل بيها بالتليفون من الشغل يطمن عليها كل يوم
إنه يفتكر يفتح لها باب العربية قبل ما تركب
إنه يتصل بيها لو هيتأخر على الغذاء
إنه يحاول يزود الوقت اللي بيقضوه سوا
طبعا الكلام ده مش مقتصر على ريم بس، جوزها كمان لو عنده مشكلة ممكن يتعامل معاها بنفس الطريقة، وده أحسن بكتير من الوقوف قدام المشكلة وعدم حلها.. ده بخلاف إن تصفية الأمور دي أول بأول بتخلق جو من التفاهم، والنضج للعلاقة
*******


آخر حاجة.. الحل بالنسبة للمقاومة اللي ممكن تكون موجودة من الطرف المطالب بتنفيذ الجدول، هو إنه يعرف إيه النتيجة من التزامه بالجدول.. يعني إيه اللي هيستفيد بيه، وازاي ده هيؤثر عليه وعلى صحة علاقته بالطرف التاني.. وخلونا نشوف إيه اللي ممكن يستفيده الطرفين من الالتزام بالجدول
ريم هتحس إنها مش مهملة، وبالتالي هتكون أكثر عطاء في العلاقة
هو هيحس بالفخر لأنه قدر يسعد زوجته ويحقق لها راحة أكبر
الاتنين هيشعروا بالتكامل
مشاعرهم تجاه بعض هتبقى أكثر دفئا وفيها ندية أقل
الموضوع يستاهل المحاولة.. مش كده؟
*******

يا عيني على الكلام يا عيني
يا جماعة بلا جواز بلا حب بلا نيلة على رأي ماري منيب
الموضوع صعب جدا على الطرفين
الاسهل نقضيها شاي بحليب او بودنج شيكولاته
و لو الواحد غني اوي يقضيها شيكولاته جلاكسي و كت كات و تويكس
هههههههههههههههههههههههههههههه
انا بهزر بس
الموضوع جميل جدا شكرا يا انسة شايلة او مدام شايلة

M.3adel